მიმდინარეობს ტექნიკური სამუშაოები, რის გამოც საიტზე განთავსებული ინფორმაცია შეიძლება იყოს არაზუსტი

ეკოლოგიური მასალები აბაზანისთვის

მოაწყვეთ აბაზანა ეკოლოგოური მასალებით


როცა აბაზანის რემონტზე ვსაუბრობთ, გვერდს ვერ ავუვლით ბოლო წლების ტენდენციას - მოვაწყოთ ჩვენი აბაზანა ისე, რომ ეკოლოგიური იყოს. ეს გულისხმობს, არა მხოლოდ ნატურალური მასალების არჩევას, არამედ ბუნებრივი რესურსების რაციონალურად გამოყენებასაც.


მასალები კედლისა და იატაკისთვის


კერამიკის კაფელი კედლის და იატაკის მოსაპირკეთებლად  ყოველთვის იყო და რჩება ყველაზე პოპულარულ ეკოლოგიურად სუფთა მასალად. თუ  გსურთ, რომ ოთახს შემატოთ მეტი ბუნებრივობა, მხედველობაში მიიღეთ ნატურალური ქვის მასალა ან მინის კაფელი. 


ავეჯი


ავეჯის და თაროების არჩევის დროს, სასურველია არჩევანი შეაჩეროთ ნატურალურ ხეზე. მინის ნივთების დამატებაც კარგი ვარიანტია. ხის ავეჯის არჩევის დროს, ყურადღება მიაქციეთ პროდუქტის აღწერილობას: მერქანი უნდა იყოს დამუშავებული განსაკუთრებული წესით, წინააღმდეგ შემთხვევაში შესაძლებელია ავეჯმა ფერი შეიცვალოს ან გაიბეროს და დროზე ადრე მოგიწიოთ შეცვლა.




აქსესუარები


თუ გსურთ, რომ ხაზი გაუსვათ ეკოლოგიურად სუფთა დიზაინს, გამოიყენეთ ბუნებრივი აქსესუარები: ქვები, ნიჟარები, დაწნული კალათები, ცოცხალი ყვავილები.




გაითვალისწინეთ: როცა ირჩევთ ყვავილს, წინასწარ გაიგეთ, თუ როგორი პირობების მოყვარულია და როგორ ადგილებში შეიძლება მისი გაჩერება. აბაზანისთვის კარგია: გვიმრა, ფიკუსი და სურო. მცენარეთა ეს ჩამონათვალი კარგად გრძნობს თავს ტენიან ადგილას და ისეთ პირობებში, სადაც დღის სინათლე პრობლემატურია.




ბუნებრივი რესურსების ეკონომია


მთელ მსოფლიოში დიდ ყურადღებას აქცევენ ბუნებრივი რესურსების სწორად გამოყენებას. ბევრი მწარმოებელი იზიარებს ამ მიდგომას და წარმოების დროს ითვალისწინებს ისეთ საკითხებს, როგორიცაა, ელექტროენერგიის და წყლის დაზოგვა, რაც მეორეს მხრივ ფინანსური კუთხითაც მომგებიანია.


წყლის ეკონომია


ახალი ტექნოლოგიებით წყლის შემცირება შესაძლებელია სპეციალურად შექმნილი საშხაპე სისტემით. ჩვეულებრივ, საშხაპე ყურმილში გადაიცემა დაახლოებით 25 ლიტრი წყალი 1 წუთში. მაგრამ ახალი მოდელების წარმოების შემდეგ ეს რიცხვი 2-ჯერ შემცირდა.


ონკანები


ახალი ტიპის ონკანები განსხვავდება ძველისგან, დიზაინში შეტანილი ელემენტით, რომელიც შლის წყლის ნაკადს და ავსებს ჰაერით, რითაც ზოგავს წყლის მოხმარებას.




წყალი და ისევ წყალი


მოძველებული უნიტაზი ჩვეულებრივ ერთ ჩარეცხვაზე 9-12 ლიტრ წყალს ხარჯავს. ახალ მოდელებში ეს მაჩვენებელი დაყვანილია 7-8 ლიტრამდე. ზოგ მოდელს აქვს ორმაგი ჩარეცხვის დასაჭერი, რაც უფრო მეტად ზოგავს წყლის მოხმარებას.


როგორც ყველგან, ძირითადად ჩვენს სახლებში აბაზანა ისე არის მოწყობილი, რომ ბუნებრივი სინათლის წყარო გათვალისწინებული არ არის. ამ შემთხვევაში, რა თქმა უნდა, სასურველია გამოვიყენოთ განათება. ოპტიმალური გადაწყვეტილება LED ნათურებია. ისინი მოიხმარენ ცოტა ენერგიას და ძვირიც არ ღირს.